Unha moza

El dicía que só aspiraba a ter moza. Só unha moza, pro dentro dela (como naquela canción de Garnet Mimms, como no poema de Pound) cabería o universo enteiro. 

Desnortado

—Sempre regresas desnortado ó Norte! —dicíasme, cun sorriso, antes de abrazarme. 

Esta imaxe fíxena na Granda (Santiso de Abres). O antigo casarío da foto pertence ós meus avós maternos; hoxe deshabitado, nel viviron familiares nosos.

Ignorantes

Entran nunha droguería pensando que comprarán a Beleza. 

Feitizo

Onte, conversando virtualmente cunha rapariga soñadora, escribín "preciosamente" en vez de "precisamente". Correxir o erro tería significado romper o feitizo.

[Santiso de Abres, 2014]

Brote da primavera santiseira de 2014. A imaxe tomeina en Robaín, o casarío dos meus avós maternos. Facendo a foto, lembreime daquel fermoso título de Proust: Á sombra das raparigas en flor.

Avó

Avó, se ti soñas comigo e eu soño contigo, atoparémonos no mesmo soño.

Caricias

Dis que as miñas caricias levan guante 
e que as túas están espidas. 

Peitos

A delicada puxanza dos teus peitos.

Primavera do 98

Negábaste a crer que a mimosa é unha planta invasora. 

[Infancia]

Xerga

Ven e apréndeme a xerga dos teus bicos. 

Paxaros

Eu sei a que especie pertencen os paxaros que tes na cabeza. 

Época

Veño dunha época pasada na que nunca vivín.

Frío

Malia todo, non podo odiarte. Porque grazas a ti practiquei un alto exercicio de sinestesia: grazas a ti descubrín a que sabe o frío.

Virías

Virías dun filme de Truffaut, e a túa voz faríame cóxegas, e gardaría os soños nos teus calcetíns... 

Claude Jade e Jean-Pierre Léaud, en Bicos roubados (François Truffaut).

Avó

Avó, se ti soñas comigo e eu soño contigo, non será difícil que nos atopemos no mesmo soño. 

O estudante de Retórica

...E eu pensaba en ti, rapariga, eu pensaba en espertarte ao ler aquel concepto de Perelman: metáfora adormecida. 

Servidor. Madrid, abril de 2013.

O admirador

—Escollinte pola túa condición de artista —asegurabas, e sabías de memoria os meus poemas, pero o certo é que no noso romance fun eu o admirador. 

Ecografía

Eu chegaba cara a ti excitado, 

pro ti só oías a miña ecografía.

Orixe

Dicíasme que viñas do gospel: e iso pra min equivalía a dicir que viñas da primavera.